Sunday 21 June 2009

Who and How

مشتااااق والله.. اول شي.. زمان عن المدونة P:

بس جد الامتحانات مو راحمة.. رغم إنو مو كتير صعبة المواد بس يعني...

المهم.. أنا مخطط أكتب عن هالصيف وشو رح يصير في جمعة العيلة.. فحبيت بس أبين مين اللي بيعرف إني جاي.. وبس للتسلاية لأني فاضي كيف عرفوا..

أول شي بسام طبعا.. كيف عرف أنا حكيتله.. ما صدق طبعا أول ما حكيتله فكرني بمزح أو هيك.. قمت صرت أتفلسف عليه وحلفتله بالآخر إني هيك وصدق.. طبعا انصدم لأنو متوقع المثليين بيختاروا يكونوا هيك.. وإنو المثليين هما اللي بيمارسوا لواط وما بعرف شو.. المهم أسبوعين تقريبا ما كلمني بعد ما حكيتله بعدين رجع يكلمني انو هو بيعرفني وبيعرف اني محترم واذا انا مثلي هدا مو شغله..

تاني شي..
أسماء طبعا.. وصاحبتها ليلى.. كتبت من قبل كيف عرفت.. صاحبتها ليلى ما بعرف.. يمكن حزرت بس ما اتوقع.. اكيد اسماء حكتلها ما بعرف.. المهم مو فارقة معي ليلى كتير لأنو شخصيتها ما بتعجبني..

ابن خالتي.. كمال..

وهو اللي خلاني أعرف إني هيك أصلا.. كنا بصيف بغزة.. قاعدين بالفيلا تبعت خالتي.. وقتها كنت ماكل لسعة من الشمس..
tip: always wear SPF :P
ما كنت بدي أطلع فقلت بدي ضل بالفيلا وابن خالتي كان وقتها بيحضر للبريزنتيشن للجامعة لمدري شو.. فحكا إنو رح يضل قاعد معي..

بعد ما خلص من التحضير ناداني نحضر فلم سوا.. كتير حاولت أتذكر شو كان الفيلم بس ما بقدر.. بتوقع مستر آند مسّيز سميث بس مو أكيد.. المهم واحنا بنتابع كان فيه مقطع رقص بين رجل وبنت اكيد.. مو لازم احكي يعني الرجال اكيد كان hot
ما بعرف كيف كان وجهي وقتها.. مبتسم او بطلع او ما بعرف كيف المهم كمال لاحظ.. فقام بيمزح بيحكيلي "شو عاجبتك البنت؟"
وقتها ما كنت بعرف شو المثلية وكنت مفكر اني بحب الاولاد عادي مافيها شي.. بكل براءة قمت جاوبت عليه "لا.. بس الشب حلو.."
بتوقع كان متفاجئ من ردي او هيك.. ما حكا شي لباقي الفيلم.. بعد ما خلص فتح الموضوع تاني وسالني عن الممثل وكيف انا معجب فيه.. فكر إني معجب بتمثيله او هيك قلتله لا بس وجهه وجسمه حلو..
وسالني عن البنت فقلت عادي حلوة بس ما بتعجبني.. راح عاللابتوب فتح النت وعمل بحث بقوقل.. مو متذكر بس بتوقع كتب
girls in bikini
يعني المهم صور نساء لابسين قصير.. وقعد يسألني إذا فيه وحدة بتعجبني منهم.. طبعا ولا وحدة حكيت.. بعدين بحث جديد
shirtless men
بتوقع ما تركت حدا إلا وحكيت عنه xD
مو لهالدرجة بس يعني شاورتلوا على كم راجل حلو..

هو طبعا كان متفاجئ كتير وقتها.. بعد أسبوع رجع وحكالي إنو دور عالنت وإنو مو زعلان مني ولا شي.. وشرحلي شو يعني المثلية..
الله يخليلي ياه.. رغم إني صرت أخجل منه بس أحسن ابن خالة والله :D

**
بس هدول اللي بيعرفوا هالشي 100% أكيدين.. بس لازم أذكر خالتي رولا..

أوك.. هي ما بتعرف بس السنة الماضية كانت شغالة تلميحات.. إنو بدها مني أحكيلها أو هيك..
هي ما بعرف كيف.. بلاقيها لما نشغل الآيبود أو لما بنات خالتي يلبسوا جينز (بنات خالتي كلهم صغار.. مافي غير وحدة فوق الــ15 ومحجبة) بتجي تحكيلنا نتسلى بشي تاني..

بس بنفس الوقت بلاقيها بالجمعات تقعد تسألنا أسئلة شوي محرجة.. يعني بنات خالتي بتسألهم عن شباب فصلهم وكيف معهم وحياتهم المدرسية.. وأولاد خالتي الكبار بتقعد تسألهم عن بنات الجامعة وهيك.. وهي صارت يمكن 4 مرات هالقصة.. وكل مرة يجي الدور علي كانت تسألني "وإنت كيف الشباب معك؟"
طبعا ما كنت أرد.. ماكان فيه حدا بيسمع غير كم وحدة من بنات خالاتي واولاد خالاتي الكبار وما كانوا ينتبهوا (يتوقع كمال كان ينتبه -رولا مو هي إمه-)
القعدة يعني بتكون كبيرة وبنكون مجموعات كبار وصغار وقاعدين بنتكلم بشي موضوع.. مو هي المرة الوحيدة اللي لمحتلي فيها يعني بلاحظ منها أكتر من مرة بس بتكون عالخفيف.. يعني مثلا لما كنا بالشاليه كانت تضحك وتحكيلي ما روح اسبح مع الشباب انو مزح..

بس هدول هم اللي بيعرفوا إني جاي.. :D

1 comment:

  1. بوستك حلو كثير خلاني افكر في مين بالضبط يعرف عن ميولي ومين لا وكيف

    شكرا على البوست رجعلي ذكريات كثيرة

    ReplyDelete